~ موضوع مهم جدًا ~

saudi_girl.20 · منذ /06-04-2009, 06:07 PM

السلام عليكم ورحمة الله

كيفكم أعضاء زحلطن وكيف أحوالكم ؟

معليش أزعجتكم كل يوم جايه بمشكلة

بس الله يعافيكم ويخليكم وقسم لو ماني محتاجة ومهمومة عشان هالشيء ما طلبت المساعدة

وحدة من قريباتي مشكلتها مشكلة

وبقص عليكم مشكلتها بس لا تبخلون علي بالرأي السديد

البنت أكبر أخوانها وتعيش بين عائلة الكل يضنها من أسعد العائلات

لكن لما يتعمقون بيكتشفون أشياء ما كانوا يتخيلونها

معنى كلامي أن والد البنت مآخذ دور الأب المثالي , وهو بالفعل مثالي

لكن ومثل ما قالت لي البنت إنها كل ما احتاجت له وقالت له أي مشكلة تواجهها

يا أنه يعطيها آراء ونصائح ما تليق بسنها , وكأنه يعتبرها بسنَّه !

أو إنه يسكت ولا يقول شيء , وبعدها يروح يخبر أخوانه , هذا كلامها , ولما سألتها كيف عرفت إنه يقول

قالت ما سمعتي عمي ذاك اليوم يقول لنا كذا وكذا , هذاك كلامي لأبوي !

بمعنى إن أبوها يا يعطيها نصائح ما تليق بسنها وعمرها , يا إنه يسكت ويستصغر المشكلة ويقولها لإخوانه على أساس إنها سالفة مضحكة وكذا .

أما أمها , فهي إنسانة الله يهديها بس

بمعنى إنها تدلع بنتها الصغيرة ومعطيه بناتها الباقين أشكل !!

ممكن تقولون أكيد لأنها الصغيرة , بس هذا بشكل ما يتصور

وعلى كلام البنت , إن أمها مثلا على سبيل المثال لما تشوف غرفة البنات غير نظيفة أو محوسة تعايرهم وتقول [ يالوسخين يالـ .. ]

وبعدها على طول لما تجتمع مع أخواتها تجلس تسب بناتها وتقول لهم سواياهم في البيت !

صحيح الكل له عيوب والكل له أخطاء بس مو لدرجة إن الأم تفضح بعيالها بهالطريقة !

عمومًا البنت اتصلت علي اليوم ويا عمري جالسه طول المكالمة تصيح

البنت شخصيتها ما تسمح تبوح بكل اللي بخاطرها وقلبها وتقول لأهلها عشان يتفهمونها

قلت لها تقول لها اللي بقلبها ولا تبقي شيء

لكنها قالت [ ما أقدر , وبعدين لا تحسبين إني ما عمري قلت لهم ولا اشتكيت منهم لهم , لا والله قلت , قلت لأبوي أنا وأختي عن أمي وإنها تفضح فينا , جلس يقول هذي أمكم تحبكم لكن ما عندها أسلوب ولا تقدر تعبر عن اللي بخاطرها ]

وتقول إننا قلنا لأمي بعد لكنها تسكت ما تقول شيء

وتقول بعد [ إن أمي طول عمرها مقصرة معنا , اللهم بشيء واحد إلا وهو الشراء , صح إنها تشتري لنا , لكن من النواحي الثانية حيل مقصرة , " تقولها وهي تبكي مرة لو تسمعون نبرتها وقتها ! " تخيلي مرة كنت حيل محتاجة لها وجالسه أتطلبها إنها تجي أو على الأقل تسأل المعلمة لأنها منقصتني ظلم , جالسه أتطلبها عشان تجي وقالت طيب , ومر كم يوم سألت المعلمة قالت لا ما جتني أصلا ليه تجي , وبعد كانوا بيكرموني في حفل الأمهات وجالسه بين يدينها وأحن عليها تجي وأقولها أبيك تشوفيني وهم يكرموني أبيك شوفيني وأنا آخذ الهدية كل صاحباتي أمهاتهم يجون إلا أنتي ]

ولا جت أمها !

حقيقةً البنت كاسرة خاطري حيل وأبي أساعدها بأي شيء

قلت لها أكلم أبوها اللي هو خالي لكنها قالت لأ لأنه بيزعل لأني قلت لك من مشاكل البيت

قلت لها طيب خليه يعرف إنه مقصر

قالت [ لأ , وهو دايم يقول لنا لا نقول لأحد , بس والله ماعاد فيني أتحمل قوليلي شسوي ! ]

ماهم أمها وأبوها بس , حتى أختها اللي قرب سنها وأخوها اللي بالابتدائي

يستهبلون عليها ودايم يجلسون مع بعض ويخلونها برا الغرفة

والولد يضربها ولما تقول لأبوها يضربه خفيف وعادي

ولما تطفش أو تمل وتقول لأبوها أو أمها يردون عليها ويقولون [ معليش أنتي الكبيرة تحملي وكوني قدوة لأخوانك ! ]

صحيح هي الكبيرة بس ماهو ذنبها والله وكل شيء فوق راسها !

وعلى فكرة البنت مرة حساسة ولا تتحمل كثرة الأشياء عليها

منتظـره

ƒ∂ťỏδмά · منذ /06-04-2009, 10:13 PM

وعليكم السلام ورحمة الله وبركاتهـ ..

صراحهـ انا انصحك تعرضيها على الدكتور محمد الثويني ..

وله موقع راسليه فيهـ .. او خذي ايميلهـ ..

ان شاء الله افدتك .. لاني مااقدر احط رواااابط ...

s a r a · منذ /06-05-2009, 02:37 AM

عليك السلام ..

حياك الله ..

المشكله واضحه وبسيطه ولا فيها اي نوع من الشي الغريب او المريب ..

كلمة قلتيها يالغاليه واتوقع ان كل المشكله من هالشي اللي هو حساسيتها الزااايده ..

اقتباس:

وعلى فكرة البنت مرة حساسة

البنت اتوقع والله العالم انها في بداية مراحل المراهقه يعني تقريبا في المرحله المتوسط او بداية الثانويه والله اعلم ..

هالعمر غالبا مايكون فيه الشخص شديد الحساسيه من االاشخاص اللي حوله ، لكن المشكله مره عاديه ومافيها شي يعني لو قالت الام لخواتها انو بناتها كذا وكذا كل الامهات يسولفون مع اخواتهم عن حياتهم اليوميه والاسريه ..

البنت مافيها اي مشكله لكن معضلتها هي (( الحساسيه )) مع الايام أأكد لك انها راح تعتبر ان هالشي اللي صار طبيعي جدا جدا ..

بالتوفيق ..

saudi_girl.20 · منذ /06-29-2009, 07:19 PM

فطومهـ}~

ربي يجزآك عني كل الخير بجد أشكرك وبطرح عليه إن شاء الله

سآرآ }~

قلت هذا وكلامك صحيح أعرف

بس ممكن حساسيتها تسوي شيء ثاني وهالشيء أنا خايفه منه

عمومًا أنتوا الثنتين أشكركم بجد شلتوا عني هم كآن كبير بقلبي

الله يوفقكم وين ما كنتوا

دلع الجنوب · منذ /07-04-2009, 02:39 AM

مومستعده تناقشين ماله داعي تكلفين على عمرك وتحطين رد اجل

ولحد يكتب زيها لي باك والامالي نفس ..
/
مشرفة القسـم

فشفاش · منذ /07-06-2009, 06:30 AM

والله انا مع سارا بكلامها وانه شي طبيعي وهي تشوفه انه كبير بحكم عمرها والمرحله اللي تمر فيها ,,
وخصوصا انك تقولين انها تفرق بينها وبين اختها الصغيره ، ومعنى كلامك هذا انها تحس بالغيره من اختها الصغيره وهذا كله يؤكد انها بس مرحله وتعدي على خير انشالله ،،
تقبلي ردي وودي..

منذ /07-10-2009, 05:31 AM

والله مدري وش اقولك بس ابي انبهك عن شغله انتي بتسوينها قاصده فيهاالخيرلها
وبتكلمين خالك نصيحتي لاتكلمينه ترا بتزيدين المشكله عليها .. لأن شي طبيعي مافي احد يحب اسراربيته تطلع
لولـ أخوه ..
عمومآ .., تروق وتهدي اعصابها ومالومهاوالله وخاصه ضاق صدري بسالفة المدرسه وحفل التخرج ..
هينااقولك امهاغلطـانه بهالشي ..,
خليها تهدي اعصابها وتفضفض لك دايم واسمعي لها عشان ماتحس انهامحد لمهاولايسمع لهابشي .
ويخليهاتلجا لأشياء الله يغنيهاعنها يارب
ويهدي امهاا ويحنن قلبها عليها.

-●{ Ŝђάђάđ }●- · منذ /07-30-2009, 07:04 AM

●●

يآقلبي عليهآ ~

وحدهـ من قريبآتي بنفس معآنآتهآ وآردآء والله ~

بس آ‘نآ‘ مآ آخليهآ بحآلهآ دآيم اخليهآ تفض فض لي وتشكي عشآن صدرهآ لآيضيق وتتهور ~

هي حآولت مره تنتحر وآنقذوهآ آهلهآ على آلنهآية ~

آنتبهي عليهآ لآ تسوي كذآ آو آخس بعدين حنآ حسآسآت بهآلسن حتىآ آنآ آحيآن

آتضيق واشوف الآشياء بنظره ثانية بس آرد لعقلي وآفكر زين ~

وآنتبهي تكلمين خآلك ترى وربي بتكبر آلسآلفة وآبوهآ بيهآوشهآ ويمكن يحقد عليهآ بعد

وبخصوص آمهآ خليهآ تكلمهآ مره ثآنية تجيهآ بشويش وتقولهآ يآ آمي ترى آنآ آحس كذا وكذا وكذآ

وإن شاء الله ربي يهديهآ وترد حق بنآتهآ ~

وبالنسبه لآخوهآ لآجآء لمهآ بعد كذآ توقفه عند حده ولو قالوآ شي آهلهآ تقولهم مو آنآ آلكبيره يآ آمي خلآص

خليني آعقله وآعلمه آنه عيب يمد آيده على آلكبير عشآن لآ يتعلم ويصير يطق آي آحد كذا مو زين ~

هذآ آ‘للي آقدر آقوله وآبسآل آبوي وش آلحل وآرد لك ~

خبرك هو يعرف كيف يتعآمل مع موقف زي كذآ ~

آ‘لله يعينهآ ويهدي آهلهآ ~

.,.

saudi_girl.20 · منذ /07-30-2009, 07:23 AM

من جد يعني أشيل فكرة إني أكلم أبوهآ !!

شهـد < لهالدرجة وصلت إنها فكرت تنتحر !

عمومًا ، الله يسعدكم يالحبآيب والله يوفقكم وييسر لكم كل عسير يا حي يا قيوم

والله لا يحرمنآ منكم قولوآ آميين

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

الإهداءات